2024回報49%，2025靠港股

我今年整體倉位回報是49%，當中港股倉回報 37%。

唔少行家今年賺得仲多，但我自己算比較滿意

作為比較，恆指今年升17%，標普升27%，納指升33%

回報主要由比特幣+港股獲得，兩邊都是食曬成個升浪

港股沒有在10月高位大手止賺是敗筆，但整體還算滿意。

更大遺憾是美股的回報唔算高

我去年擔心美國減息不及預期+有機會經濟衰退，會導致美股偏弱

最後結果是，就算減息不及預期，但因為以下原因，美股升幅大超我預期

1）美國經濟數據超預期，實現軟著陸

2）美國利率高+美元強+加上環球經濟動盪，美國源源不絕吸引全球資金

3）今年最獲投資者認可的AI股，龍頭都在美國，帶領美股創新高

我近年最大的takeaway是，最影響股市的是流動性

美國近年升浪主要是由強美元+高利率驅動

美國加息，加上其他國家經濟疲弱，美國吸引了全球資金

流動性氾濫下，咁啱美國開始AI革命，華爾街講AI故事，投資者越來越buy in

美國經濟還算可以，股市越升越高，吸引更多資金，形成正反饋

港股近年偏弱有不少原因，但我認為國際資金跑去美國買國債賺高利率，是最根本的原因

展望2025年，我會維持港股+美股，兩邊都睇

做得多預測的都知，預測股市極難

但如果一定要我估，我估中港股市2025年會跑贏美股

根本原因是，以上提到的流動性邏輯，開始逆轉

美國剛開始了減息週期

去到年中，減多一兩次，美債的吸引力會大降，資金會轉買其他資產，美元轉弱

當然，資金唔一定買港股，好多會買日股，買印度

但港股估值低，我認為只要有Catalyst，唔少資金會買港股的

現在投資者最關注的Catalyst是中國的財政刺激金額，有望在3月公佈

另外，如果有谷股市/消費的新政策，或者公佈超預期的經濟回暖數據，都算是 Catalyst

就好似9月，只需要一個新火花，就可以點燃整個市場

一年的維度，港股上升空間是可以期待的

港股唔係升唔起，只係時間未到

最近有唔少留言，覺得需要政府救的市場唔值得投資

但其實，美國才是那個最相信政府救市的市場

2008年後，只要市場有風吹草動，就開始印錢救市

新冠疫情時，除了救股市，仲送咗8000億美元俾每一個美國人刺激消費，平均每個人攞3000美元。

除咗美國，日本同樣是大力放水幾年，終於救起經濟。

兩個國家的救市力度都遠大於中國

就係因為各國政府救得多，而且有效，投資者才堅信救市是有效的，一直等中國政府出手

只要錢夠多，一定可以救得起中國經濟、股市

一直以來，核心問題是中國政府究竟想唔想救，而最近兩個月，官員開始表態會開始救。

明年會有更多新政策，是可以期待的。

至於美股，我估計下年指數回報會回落至10%以下，而且會是比較波動的一年

三個原因

1）已經連續兩年升超過20%，大股估值已經是近年最高，需要時間消化預期。基金、散戶倉位已經是歷年最高，冇乜新資金。

2）特朗普就任有很高不確定性，而且今次明顯是要大改革的，對外以及對內

3）上面提到的，美國減息+美元轉弱後，部分資金會買其他資產

專業投資者鍾意將回報拆開成Beta + Alpha

Beta是大市的回報，Alpha是跑贏大市的超額回報

以上講的主要是Beta，而我認為美股還有大量Alpha空間

美股就算大市冇咁強，依然有大量優秀公司

全球最優秀人才、資金還在不斷流向美國

各個板塊的龍頭公司（半導體、AI、軟件、區塊鏈、生物科技、消費 ）

都是全球領先，管理最優秀，賺錢能力最強的

明年美股只要沒有陷入大熊市，還會有不少個股Alpha機會

例如，開始有公司靠賣AI服務賺到錢。

另外，前兩日講的ASIC趨勢，大公司自研AI芯片替代NVDA，相關公司都是值得關注。

做個總結，預測2025年會是比較波動的一年

睇好中港大市可以跑贏美股

但如果識揀股，美股同樣有大量投資機會

最後，祝各位2025 年更上一層樓，實現財務自由

下篇文章分享具體板塊+個股