【絕密技巧公開】Larry Williams道指2024年路線圖預測

以下是筆者今日FB帖文內容，一併於投資武林以公開文章形式發表。

鍾意江恩/週期/美股大盤路線圖預測嘅朋友應該識Larry Williams（LW）🧐琴晚無意睇到佢2024年預測片（片長45分鐘，含金量極高。有講10年週期型態及18.6年北交點週期），大家可直接睇佢今年嘅預測（圖1，藍線），另附上佢舊年預測（圖2）

圖1：LW道指路線圖預測（2024年，藍線）

圖2：LW道指路線圖預測（2023年）

睇過往「同字尾」年份走勢，再用電腦（譬如江恩軟件Optuma）綜合出歷史平均走勢，用黎預測今年走勢，係最正宗路線圖玩法。（我冇課金Optuma，退而求其次用星球派方法，睇標指立春前後約1個月某日嘅日內走勢，去預測全年走勢🤭）

譬如想做2024年走勢預測，我地就睇過去「4字尾」年份點行。但留意並非所有「4字尾」年份都同等重要，我通常優先關注符合特定週期數嘅年份👀（例如20、30、60及90年週期）

圖3：LW道指路線圖預測及檢討（2008年）

LW檢討2008年預測（圖3）時發現咗個方法，可提高命中率。唔少「8字尾」年份好強勢，用所有「8字尾」年份整路線圖，錯到仆街（紅線）。但如果我地搵邊啲「7字尾」年份最貼近2007年走勢，用緊接果堆特定「7字尾」年份嘅「8字尾」年份去預測2008年（藍線），效果會好好多😳

同樣道理，我地搵出最貼近2019年實際走勢嘅「9字尾」年份（圖4，藍線），用緊接果幾個特定「9字尾」年份嘅「0字尾」年份做2020年預測（圖5，藍線），會貼中COVID股災及3月低位！🎯

圖4：LW重視與2019年走勢吻合的「9字尾」年份，用緊接該等年份的「0字尾」年份去預測2020年大盤走勢

圖5：LW道指路線圖預測（2020年，藍線）

我幾肯定澳洲佬有用類似技巧（佢講過路線圖唔係搵晒所有「同字尾」年份做歷史平均就搞掂），澳洲佬2020年道指路線圖同LW果幅9成似😏

講返LW今年嘅預測（圖1，藍線），我估佢特別睇重2004及1934年，所以貼5、8、10月低點（記住路線圖永遠重視高低點型態多過實際升跌幅，而且唔可以單獨用）。呢種技巧我都係啱學，假如美股大盤預測有修正，會出帖/拍片。大家如果覺得呢個po正，記得點讃分享，感謝！🙏