維持美股9月尾至10月初有中線上車位嘅判斷

琴晚｢巨硬｣（微軟，MSFT）同Adobe（ADBE）又新高，與港股平行時空。上半年錯過上車位，點搞？唔使怕，雲狄相信未來個半月有機會。唔預跌好多/股災，但標指高位回6-10%係有可能嘅。

圖一：納斯達克100週線圖，今年2月較去年3月低位升1倍後出現中線調整

圖一係納斯達克100週線圖。今年2月，納斯達克100比舊年3月低位升1倍、逼近九方圖點位13,984點，隨即於2-5月展開中線調整。圖二係標指週線圖。目前攻至略高於九方圖點位4,423點，比舊年3月低位升1倍。

圖二：標指週線圖，目前較去年3月低位升了1倍，關注會否有中線調整

大頂/大底嘅1倍，係江恩經常提及嘅阻力/支持位，美股大盤現時到達價格密集阻力區。時間方面，正如早前係YouTube講，關注9月尾到10月初。9月尾到10月初中長線週期密集（見圖三、四，其中90年及120年週期因為年代久遠未能顯示），加上秋季係美股傳統淡季，有權出現中線低點。

圖三：標指月線圖（對數刻度），長線週期指向2021年9月尾到10月初。美股「1字尾」年份秋季通常有低點，但倘若處於極長期牛市（例如1961、1991及2021年），此低點威力會減弱。

如果標指8-9月回調，我會關注九方圖支持位4,161點（圖二粉紅線）防守力度，納斯達克100關注週線支持線（圖一黑線）。除非標指企穩4,423點數週，否則不足以說服我現價大手加倉美股。

圖四：標指日線圖，中線週期指向2021年9月尾到10月初，當中以15個月週期較重要

美股DNA牛長熊短，又處於二戰後第3波極長期牛市，週期高低點變得相對次要（見圖三註解）。坦白講，美聯儲無限印鈔，確實弱化左美股嘅下行週期（唔好忘記美聯儲每個禮拜仍然真金白銀買緊債）。如果唔印錢，舊年2-3月標指可能腰斬。開外掛QE，變左跌35%再拗腰升1倍。此等逆天改命之事，全世界得美聯儲有本事做。大家可參考小弟之前文章《美股二百年圖與牛長熊短DNA》，會發現自從美國二戰後建立美元霸權，美股長期走勢牛左好多。